系啊！老啦我哋，开始发现啲嘢变得太快。」
「系啊，初老症状啊。唔再系以前中学鸡咁啦。」
「连部琴，我都好少掂啦」啊妈已经问起好多次，几时可以掉咗屋企部琴佢。
「好似，过咗中学之後，大家都同音乐脱离咗关系。」
佢哋映完相，都差唔多时间去食中午饭。但唔知点解，咁耐无返嚟嘅我，想喺度留耐啲。我又行返返去礼堂嘅门口，望住完全黑哂嘅礼堂。我喺呢间学校嘅第一日同埋最後一日，都系呢度过。但系喺呢个台上面，有更多比开学礼同毕业礼更重要嘅事发生过。
「唔使紧张喎，」喺後台嘅Hugo拍一拍我嘅左边膊头，稍稍gel咗头嘅佢喺今日呢啲特别嘅日子好似特别醒神，眼角都好似比平时更多一重傲然嘅气势。「平时咁就得啦，黄金左手」
我企喺佢左边嘅位置，黑色嘅电子琴接驳住电线，我手指已经架好喺第一个chord，等待鼓棍嘅指示。台下嘅欢呼声大部分都系向住最後一次喺呢个台上面表演嘅Hugo。纯白色嘅恤衫有少少未摄好入贴身嘅西裤入面，有少少松嘅领肽令佢个人睇落有少少rock味，但仍然无损佢黑色西装褛嘅气派。毕竟都已经系成晚嘅压轴表演，大家嘅仪容比喺一开始都已经无咁姿整。
各种乐器同时奏起，喺协调嘅节奏底下，引入咗Hugo柔和嘅声线。我偶尔加入辅助令佢嘅声音喺台下嘅人耳中浮起，而佢手上嘅结他，都一直牵引住大家嘅耳朵。
「Tonight, we are young
So let’s set the world on fire, we burn brighter, than the sun.」
太过青春嘅回忆都系记载住唔可以重头嚟过嘅日子，但系我当时仲未知道，净系识得望住佢，对住咪stand唱住，叫大家将点燃世界嘅热血歌词。到而家望返住空无一人嘅台，反而喺度谂，自己当时个样系点嘅样？我又有无，好似当时所讲，将自己嘅一切都燃烧，定还是喺我离开呢度嘅时候已经一早殆尽？
喺最後一个音停住之前，欢呼声已经掩盖咗咪入面嘅声。原本净系准备咗一首歌嘅我哋，已经准备好落台，但会长叫咗我哋走之後，留低Hugo喺台上面。佢拎起支咪，聚光灯打喺佢身上，隔离嘅射灯蓝色紫色交替，我企喺台下，等佢再度开口。
「Thanks Jess, ok」佢深呼吸咗一口气，「今次应该系我最後一次喺呢个台上面表演。」佢每一句停顿，我都听到台下观众屏息以待佢嘅下一句。「六年嘅时间，喺呢度，我哋成长过，有过好多嘅人，喺我哋生命中留低无法磨灭嘅印记。我今日仲准备多咗首歌，送俾大家。」
只系结他弦线震动形成嘅音符喺广阔嘅礼堂飘荡，佢倾前再次靠近咪stand，总结咗佢嘅中学生涯。
「人无法走过每天，为求没有带着遗憾活到终点」
就算唔系就嚟将近毕业嘅我哋，都被结他同人声缠绕而谱出嘅离愁别绪而感染。
「好比樱花盛开日期，我会为你统统储起」
台下嘅同学，有啲已经储满咗泪水喺眼角，好似Hugo手指再轻轻弹拨，就会震动到泪水跌落。其实大家都仲未知道离别之後嘅感觉系点，但就预先透支咗伤感。但去到真正同呢座大楼离别之後，我哋都不过系咁。只不过间唔中碌过呢首歌，会谂返起呢一日，记返起呢种情感。
「道别重聚也有日期，你已为我写上传奇」
佢哋成日话，到大个先识得珍惜中学嘅时光，先後悔无好好活过。但我无。我好明白一切嘅嘢都有尽头，而一切嘅事情都无法逃避改变。不过，我仍然好锺意，久唔久潜入回忆之中，淹没喺过去嘅浮沙石影。虽然我知道时间唔会返转头，而我从来都等唔切开始经历下一章节嘅人生，但如果突然之间所有嘢都重整，我可以从头嚟多一次，我仍然愿意付出我所有嘢去重新经历一次。
「愿你没有牵挂远飞，在地平线上也有我为你打气」
空无一人嘅礼堂，我唔觉意又唱起呢首歌。
「去吧，我会永远珍惜你，直到下世纪」
大门口传嚟声音，同记忆中台上嘅声音重叠。我拧转头，见到佢。
「做咩自己一个唱歌啊？」Hugo喺礼堂嘅门口行过嚟，就好似七年前嘅佢咁。佢行埋嚟，搭住我左边膊头，而我今次，真系感觉到确切嘅体温。
——————————
新年前更一更新
当新年利是
中学都系有一个（或多个）令人面红心跳嘅男神
Daniel系一个太过锺意留恋过往嘅人
细细个睇麦兜 话爸爸留喺过去 妈妈去咗未来
净低自己一个喺而家
唔知你 喺时间线嘅另一端
有无见到你想见嘅人呢？
又值唔值得，附出咗嗰个代价？
又到情人节左右