男神follow自己，系有少少少少兴奋嘅。
因为仲系Sem头，Dance Practice 好快就完咗。楼主为咗欢迎新楼友Thomas加入我哋层楼，特登call齐人今晚食楼饭，顺便食埋开Sem饭。我哋六楼嘅十几个人，就咁浩浩荡荡咁颓t踢拖行落去士尾菲路熟食市场。大排档嘅一张张枱摆满街市嘅顶层，陈旧嘅胶凳围住一张张油腻嘅木枱，一间间食肆唔算多人，但人声鼎沸嘅室内空间似乎有少少压迫。我哋咁多个人逼埋一张枱，坐我隔离嘅Thomas条灰色短裤嘅裤脚边卷起，我嘅大脾几乎贴住佢嘅大脾，肢体嘅接触令我下意识想夹脚坐，但佢又似乎唔介意。
深啡色嘅木枱上面放住一部Gas炉，鸡煲嘅气味蛀入我哋嘅衫入面，绿色嘅碗同筷子拎起又放低，而唔系食紧嘢嘅口，就系倾紧寻晚我已经同Thomas倾过嘅话题。
「咦Thomas你系咪M22啊？咁你咪识啊Jennifer Lee？」「Thomas你开咗Sem啦？」「喂Thomas你系咪都系游水好叻?？之前见你Inter-Fac都帮medic游。」
Thomas成为焦点所在，我谂有佢嘅每一个群体都系咁。有时见佢不断重覆答同样嘅问题，都好似几辛苦。
四杯啤酒过後，人嘅问题就变得有啲Chur。唔等返到Hall，戏肉就已经上映。
「喂其实呢，Thomas你Status系咩啊？」其中一位八挂至极嘅楼友问出毫无礼貌，但其实大家心入面都好想知嘅问题。有几位花生友等睇好戏，深吸一口气，牙缝之间发出嘶嘅声。
「咁chur?你」「喂关唔关你事先」「你咁想人地点答你」「咁早就round status?」「咪chur尻人啦」「人哋啱啱入嚟咋」「大仙好Chur啊」大家虽然口入面咁讲但眼神都流露八挂嘅目光。Thomas浮现有少少尴尬又腼腆嘅表情，犹豫紧应唔应该讲。正当佢擘大口之际，有人提议，
「我觉得我哋估好似好玩啲喎。」
「嗱，估咗数字先。」「我觉得，3啦。」「咁少？！我估5。」「我都觉得系3或者4。」「我估7！」「哗你尻估?？」大家开始自动竞猜Thomas嘅Status，而Thomas就笑笑口咁唔知讲咩好。
「会唔会系负数啊？」「唔会挂？」「喂Benjie你觉得呢？」
「我估唔到喎，1？」
Thomas点点头，令大家都为之震惊。
「1？」「1咁少？」「唔好讲笑喎？」
「真系得1啊。」
「有无负过先，喺咪负5之後正6最後得1啊？」
「唔系啊。一直都系1。」我感觉心入面嘅火苗当头被佢呢句淋熄咗。
「咁英文字母呢？A定O？定系OBA啊？」「如果系1，我觉得系O喎。」
「O啊。」Thomas直认不讳。
「一齐咗几耐啊？」
「1年啦。」
「哗，睇唔出喎。」大家都对O1嘅Thomas有新嘅认识，稳定拍拖中嘅佢，似乎唔系我哋认识中嘅嗰个。
「喂有无相睇先？」
「唉屌你唔好咁Chur啦。」
Thomas只系笑笑口，大家都识做唔继续追问落去。
返到Hall，对面房嘅人叫咗几个人出去睇波，原本叫埋Thomas，但听朝要早起嘅佢决定都系喺房睇flix。我八卦咁望住佢部电脑，Money Heist嘅片段喺萤幕上面闪过，佢好投入咁睇紧，我偷偷地喺床上面望住佢，其实，Thomas，都只不过喺普通男仔一个。
第二日嘅朝早一起身，房入面就已经得返我一个，从来都唔Reg朝早堂嘅我今个Sem终於破戒，Reg咗个十半嘅Buddhism。原本系同Anton同埋Daniel一齐读，但系Daniel 撞咗佢嘅Capstone course，所以唯有得返我同Anton。
Week 1 嘅朝早总系特别多人，尤其是系一堆堆新年伊始嘅同学仔谂住今个sem开始唔走堂，令到ustreet嘅气氛都特别热闹。原来打算留多啲时间食个早餐嘅我其实已经迟咗，但始终都要买杯咖啡先至可以行入lecture hall。第一堂上堂嘅人差唔多坐满成间lecture hall，好唔容易到搵到两个位嘅我text咗Anton，条友而加都仲未覆我。
着住袈裟嘅僧侣有浓厚嘅Indian at，已经miss咗头一part course admin嘢嘅我好快咁打开电脑个PowerPoint，但系对於lecturer讲嘅嘢，我都仲系一头雾水。电脑弹出嚟一个新message，
Anton: hey help me take notes lah, I don’t e lah.
顶，条仆街仔第一个星期第一堂就走堂，明明又系佢讲