（七）个个都单身，唔通个个都想单身咩？ （下）
博物馆入面嘅灯光忽明忽暗，我同佢兜兜转转，行咗好耐就先出返去。
出到去嘅时候，天色已经昏暗，我哋沿住摩地道行，经过香格理拉同埋好时中心，圣诞节嘅灯饰尚未亮灯嘅黄昏时份，好耐无嚟过尖东，但呢个地方好似十年如一日咁，依然系咁。唔同咗嘅系曾经簇新嘅外表，发令嘅玻璃，而加都已经变得陈旧发黄，好似更令人唏嘘。当你以为将所有嘢都保持现况就会一切都唔变，但原来啲嘢就算摆喺度，都会慢慢变质，友情系，爱情系，所有嘢都系，最後你望住身边嘅嘢都变哂，又望返自己，发现自己，都变咗唔少。就好似?越嚟越容易会对身边嘅人倾心，但又越嚟越怕开始任何嘢。
我同佢行到咗半岛中心前面嘅大喷水池，我哋喺旁边嘅石凳坐低。我望住佢喺阳光底下有少少啡嘅发稍，今日带咗眼镜嘅佢好似有多啲成熟嘅感觉，深蓝色嘅Jackwills冷衫同埋白色嘅恤衫好似佢瞳孔一样咁清澈，但系无论几清澈嘅水，如果潭底深不可测，我都系唔会睇到尽头嘅佢喺度谂紧咩。
「Daniel呀?」
「唔？」
「你咁耐以嚟，」我将望住佢眼睛嘅视线，投射返落地下，好似会无咁赤裸，
「你无谂过要同人一齐咩？」
「?我都唔知啊?」佢声音都系投射落地下，喷水池传嚟间歇性嘅水声同埋小朋友嘅游乐声，填补咗一时时无声嘅空隙。
「当你同人出街，倾计，或者?搵fun嘅时候，唔会有想同佢哋一齐嘅感觉咩？
你身边好似，好多人都同你好close，但又好似?唔系真系好close咁?」
「我?都唔知呀，我谂，我一直觉得，自己未系好可以开始一段感情挂?好似而家咁，都几好呀。」
「我以前以为，你系唔想同人一齐，但系?我越嚟越觉得，你好似等紧一个人咁。」
「可能系啦?」佢深呼吸咗一口气，眼神离开灰白嘅石地，望向远处嘅海平面。黄昏嘅阳光倒泻喺海面嘅波浪上面，一层一层，埋盖住本身混浊嘅海水，令人以为海面都系咁清澈，睇唔到水底嘅暗涌。「?我都唔知自己想点。?可能?我唔系一个咁啱拍拖嘅人。」
但我知道佢知道自己想点，不过我无特登追问落去，我谂任何人，都要有啲喘息嘅空间嘅。
就咁我哋望住被高楼大楼遮住咗夕阳，慢慢潜入水底，十二月嘅黄昏，好似比平时嚟得早少少。
「肚饿未啊？不如去食少少嘢？」
「好啊」
我哋去咗海港城入面嘅餐厅食咗啲嘢，出到嚟之後都好似天都黑咗，我哋喺LCX入面兜咗几个圈之後，百无聊赖咁又行返出海运中心，Daniel企喺玩具反斗城前面一阵，好似想入去但又唔行过去咁。
「行唔行玩具反斗城？」我唯有问佢。
「唔?唔使啦?下次先啦。」虽然佢眼神仍然留恋间铺，但脚已经唔情愿地行走。原本想笑佢低b嘅我都察觉到好似有咩唔妥，所以都系无开口。
「行玩具反斗城系咪好低b呀？」估唔到反而系Daniel开口先。
「Um?都唔系嘅，我都成日行嘅。」
「系咪一个男人真系去到一个年纪，就会突然有好多改变、成长呢？?你觉得几时，先算系唔系系细路仔呢？」佢突然认真咁望住我，搞到我都唔知俾咩反应俾佢好。
「哗，你条问题好深奥喎，你觉得你自己系咪细路仔呀？」
「我都唔知。」
「咁做细路仔，都无咩唔好呀，有啲嘢，系後生先做得。」
「可能系啦。」
我同Daniel并肩沿住楼梯行落海傍。十二月嘅夜晚海边有微微嘅风拂过，喺面上面留低轻轻嘅痕迹。对岸高楼大厦嘅灯光喺海平面上面漂荡，圣诞嘅灯饰好欢愉咁喺度跳动，附近传嚟busking嘅声音隐藏喺人声之中，好似轻轻指引我哋行过去咁。
穿过天星小轮码头，经过钟楼，沿住码头上面黄色啲灯光，行前去一个突出少少嘅空地，喺呢个一大圈人围住嘅busking前少少嘅位置停低。嘅节奏沉淀喺地面以上三寸，同埋结他嘅弦音纠缠，但唱紧歌嘅人声轻轻浮喺海上面嘅空气之中，不断撩动周围嘅情绪。我同Daniel行埋去一边嘅铁栏，两只脚架喺倾斜嘅石壆上面。
海水嘅味道随住海风拍打岸边，十二月嘅夜晚有啲冻，我同Daniel都不知不觉越坐越近。
「冻唔冻啊？」佢望住我收咗入衫袖入面嘅拳头。
「ok啦。」
佢除低身上面嘅褛，交俾我，然後佢望住外面嘅灯饰，无讲嘢。过咗一阵，佢先开口问我，
「上年圣诞，你点过?？」
「同Vi过罗。」嘴唇上面出现佢个名仍然勾起一啲破旧嘅伤感。
「Oh,系喎，Sorry，唔记得咗添。」