（五）人生若只如未见 （下）
「Vi！」
我下意识叫咗出声，其实我都唔知我应该同佢讲咩好，但我心入面其实已经预想咗一千次一万次再见到佢嘅时候应该要讲咩，不过，我而家先发现，讲乜嘢都唔重要。
佢望到我个样，愣住咗半秒钟，然後循例嘅一个笑容，就同身後面嘅男人行过，留底我一个，依然不知所措咁企喺厕所门口。
我无谂过会喺咁样嘅情况下撞到佢，但自从同Vi分手之後，有几个月时间我都每个星期落嚟，希望撞到佢，不过佢一次都无落过嚟。曾经有一段时间，我去到边度都好想好想撞到佢，好想再见多佢一面。我沉迷於寻找佢嘅踪影，每次街上面只要背影，侧面相似嘅人，都会令我大为紧张。到终於呢排我开始放低嘅时候，但佢又偏偏呢个时候出现喺我面前，挑拨起我以为自己已经放低咗嘅情绪。
我行返去Anton同Dandan度，啊Chris仲热烈咁同新朋友kiss紧，但我大脑嘅思绪混乱到已经俾唔到反应，净系可以同佢哋讲，
「头先呢?我喺出面撞到Vi，」
Dandan露出关心嘅神情，佢知道，我用咗几耐先至get over到Vi，
「我同佢say咗个Hi，但佢无同我讲嘢就行开咗。」
自从佢八个月之前喺p同我分手，我就无见过佢。一直以嚟，我都好想如果可以再见返佢，好想可以问佢，究竟我哋之间，错咗啲咩。究竟，我哋几时开始，变成无得挽回。佢最尾一句send俾我嘅message系keep in touch，但我send俾佢嘅message，就得返两个蓝剔。我每过几分钟就更新一次佢嘅ig，想佢有无post新story，疯狂追睇佢嘅post，睇完一次，又一次，不断不断碌返之前嘅message。一切完结得咁突然，咁乾脆，咁绝情，甚至令我怀疑，究竟佢有无爱过我。
已经开始醺醉嘅Anton俾咗个拥抱我，喺呢个时候，比任何说话都更安慰到我。Dandan拍咗我後背几下，我感激咁望住佢。我唔系一个好中意依赖朋友嘅人，但系识得佢哋越耐，就越发觉有时候，有好多嘢可以唔使一个人撑起。
我眼睛下意识咁扫视全场，喺人群之中寻找Vi熟悉嘅面容。企喺窗口前面嘅佢身边个有另外两个男仔，一个揽住佢，一个同佢倾紧偈。
「唔好望啦，今晚咁多仔，使乜净系望一个。我哋去中间啦。」
Dandan留意到我嘅目光，拉咗我出去，背对着Vi，尝试着我嘅注意力拉开。镭射光射一束束落落周围嘅人嘅面上面，令一切变得迷幻，我好努力想要驱逐Vi出我脑海，但一知道佢同我之间只系十米嘅距离，就令我背脊好似着咗火咁，不断潜意识咁望向後面，而每一次见到佢同身边嘅人越亲密，每一次见到佢完全无留意过我，我个心就又向下堕落少少，然後喺半空中停住，等待下一次嘅堕落。
「唔，我想呕?」Anton皱住眉头，挨落Dandan度。
「喂你唔好呀，忍住呀，喂?我搞掂佢先，你自己ok呀麻？」
Dandan拖走咗已经脚步浮浮嘅Anton，好似凑仔咁款。我原本都想跟埋去，但好似无咩帮到手，我拧转身，都睇吓Marcus喺边，点知佢已经俾个身材高大嘅男仔揽住，而啊Chris同新朋友仔亦都已经唔见咗。我身边全部都系男人，甚至有几百个男人簇拥住我，但我孑然一个，连下一步行去边都唔知。
唔知系因为想Vi妒忌，定系想摆脱嘅种被人抛弃嘅感觉，又或者只系想喺呢一晚，有个人可以陪吓我，我开始喺身边寻找新target，无论系咩人都好，我只系想证明有人系会对我有兴趣，但周围嘅人都好似已经搵到陪自己嘅人。我周围望，希望可以同人对上视线，但无人望紧我，我伸出手，希望可以触摸到一啲嘢，但所有人嘅手手脚都好似已经缠绕埋一齐，围成一个好大嘅圈，但我却偏偏企咗喺个圈出面。极度欢快嘅音乐令所有人都欣喜若狂咁跳舞，虽然我企喺中间，但就好似隔住四道玻璃墙咁样，听到声，睇到嘢，不过过唔到去另一面。咁大间酒吧，但连我少少嘅立足之地都无。
我拧转头一睇，窗口旁边嘅Vi已经唔见咗，我好想制止自己，但系我仲系急切咁样四围用视线搜索，但成间酒吧都无佢嘅踪影。我尝试行出走廊，未出到门口，就见到Dandan扶住企唔稳嘅Anton落楼，升降机门闩埋，佢哋无见到我，我都唔想俾佢哋见到我。
因为我仲未搵到Vi。
我行出走廊，见到黑色嘅地砖上面反射住白色嘅招牌。一个熟悉嘅身形企喺招牌隔离，自己一个，右手食指同中指之间，夹住一支点着咗嘅烟。佢举起支烟，轻轻吸入一口，然後呼出，白色嘅烟雾喺灯光之下飘散，旋转，上升，遮掩佢半边面。佢凌厉嘅目光望咗我一眼，然後又移开。
我行埋佢身边，喺佢左边一只手掌距离停低，挨住灰色嘅水泥墙，我无讲嘢，佢无